An Eacnamaíocht a bhaineann le hIascaigh a chur in oiriúint don Athrú Aeráide

Tá an t-athrú aeráide ag éirí níos soiléire agus, de réir mar a mhéadaíonn sé, athróidh sé táirgiúlacht an iascaigh agus dáileadh na stoc éisc. Ó thaobh na heacnamaíochta de, beidh tionchar ag na hathruithe ar iascaigh agus ar phobail chósta ar bhealaí éagsúla. Leis na hathruithe sin a bhfuiltear ag súil leo, tá gá le beartais agus creataí rialachais inoiriúnaithe solúbtha maidir le bainistiú iascaigh agus dobharshaothraithe. Mar sin féin, tá éiginnteacht fós ann maidir leis na cineálacha athraithe aeráide a bheidh ann amach anseo agus maidir le méid an tionchair a bheidh aige. Dá bhrí sin, ní mór do lucht ceaptha beartas iascaigh straitéisí agus samhlacha cinnteoireachta a fhorbairt chun oiriúnú don athrú aeráide faoi éiginnteacht den sórt sin agus iarmhairtí sóisialta agus eacnamaíocha á gcur san áireamh ag an am céanna.

Cé go bhfuil an chuid is mó den obair ar an athrú aeráide in earnáil an iascaigh dírithe ar eolaíocht an iascaigh, leagtar béim sa leabhar seo ar na gnéithe eacnamaíocha agus beartais a bhaineann le hiascaigh a chur in oiriúint don athrú aeráide. I dtoradh Cheardlann ECFE maidir leis an Eacnamaíocht a bhaineann le hIascaigh a chur in oiriúint don Athrú Aeráide, a tionóladh i mí an Mheithimh 2010, leagtar amach sa leabhar na gníomhaíochtaí nach mór do lucht déanta beartas iascaigh a dhéanamh i bhfianaise an athraithe aeráide. Áirítear orthu sin: an córas rialachais dhomhanda a neartú; úsáid níos leithne a bhaint as córais bhainistíochta atá bunaithe ar chearta; cosaint éiceachórais; claochlú tionscail trí dheireadh a chur le fóirdheontais atá díobhálach don chomhshaol agus trí dhíriú ar an éileamh ar bhia mara a ghabhtar go hinbhuanaithe; agus, go háirithe, an dobharshaothrú a úsáid mar chuid lárnach den fhreagairt ar an athrú aeráide.