Comhshaol na hEorpa — staid agus forbhreathnú 2020: eolas ar mhaithe leis an aistriú chuig Eoraip inbhuanaithe

In 2020, tá dúshláin chomhshaoil roimh an Eoraip ar scála agus ar phráinn nach bhfacthas a leithéid riamh roimhe seo.

Cé gur baineadh tairbhí suntasacha as beartais chomhshaoil agus aeráide an Aontais le blianta beaga anuas, tá fadhbanna leanúnacha le sárú ag an Eoraip i réimsí amhail cailliúint na bithéagsúlachta, úsáid acmhainní, tionchair an athraithe aeráide agus rioscaí comhshaoil don tsláinte agus don fholláine. Tá na mórthreochtaí domhanda amhail an t-athrú déimeagrafach ag géarú ar go leor dúshlán comhshaoil, agus tá rioscaí agus éiginnteachtaí nua ag baint leis an athrú tapa teicneolaíoch.

Tá an tAontas tiomanta do raon spriocanna inbhuanaitheachta fadtéarmacha a bhfuil sé mar aidhm fhoriomlán acu ‘maireachtáil go maith, faoi shrianta ár bpláinéid’. Ní bheifear in ann na spriocanna sin a bhaint amach gan athrú tapa bunúsach a dhéanamh ar chineál agus ar uaillmhian fhreagairtí na hEorpa.

Ní mór don Eoraip bealaí a aimsiú chun athrú ó bhonn a dhéanamh ar na príomhchórais shochaíocha a spreagann brúnna ar an gcomhshaol agus ar an aeráid agus tionchair ar an tsláinte — agus athmhachnamh á dhéanamh ní hamháin ar theicneolaíochtaí agus ar phróisis táirgthe ach ar phatrúin tomhaltais agus ar bhealaí maireachtála freisin. Chuige sin, beidh gá le gníomhaíocht láithreach chomhbheartaithe, ina mbeidh réimsí beartais agus gníomhaithe éagsúla ar fud na sochaí rannpháirteach chun athrú sistéamach a chumasú.