Tuarascáil 2020 na Náisiún Aontaithe maidir le Forbairt Uisce Domhanda: Uisce agus Athrú Aeráide

Is é is aidhm d’eagrán 2020 de Thuarascáil na Náisiún Aontaithe maidir le Forbairt Uisce Domhanda (UN WWDR 2020) dar teideal ‘Water and Climate Change’ [Uisce agus an tAthrú Aeráide] cuidiú leis an bpobal uisce dul i ngleic le dúshláin an athraithe aeráide agus an pobal athraithe aeráide a chur ar an eolas faoi na deiseanna a chuirtear ar fáil le bainistiú feabhsaithe uisce ó thaobh oiriúnú agus maolú de.

Tá an fhianaise eolaíoch soiléir: tá an aeráid ag athrú agus leanfaidh sí de bheith ag athrú, rud a dhéanann difear do shochaithe go príomha trí uisce. Beidh tionchar ag an athrú aeráide ar infhaighteacht, ar cháilíocht agus ar chainníocht an uisce do bhunriachtanais an duine, rud a chuirfidh teachtadh éifeachtach chearta an duine ar uisce agus ar shláintíocht i mbaol do na billiúin duine a d’fhéadfadh a bheith ann. Beidh rioscaí ag baint leis an athrú ar thimthriall an uisce freisin maidir le táirgeadh fuinnimh, slándáil bia, sláinte an duine, forbairt eacnamaíoch agus laghdú bochtaineachta, rud a chuirfidh baint amach na Spriocanna Forbartha Inbhuanaithe i mbaol mór.

Díríonn Tuarascáil 2020 ar na dúshláin, na deiseanna agus na freagairtí féideartha ar athrú aeráide, ó thaobh oiriúnú, maolú agus athléimneacht fheabhsaithe de ar féidir aghaidh a thabhairt orthu trí bhainistiú uisce a fheabhsú. Is togra é an t-oiriúnú don athrú aeráide agus an maolú ar an athrú aeráide a chomhcheangal, trí uisce, a rachaidh chun tairbhe do chách, lena bhfeabhsaítear soláthar uisce agus seirbhísí sláintíochta agus lena ndéantar cúiseanna agus tionchair an athraithe aeráide a chomhrac, lena n-áirítear laghdú rioscaí tubaiste.