Neamhchosaint mhíchothrom agus tionchair mhíchothroma: leochaileacht shóisialta maidir le truailliú aeir, torann agus teochtaí foircneacha san Eoraip

Baineann rioscaí sláinte do gach duine le truailliú agus le guaiseacha comhshaoil eile, ach bíonn tionchar níos mó acu ar roinnt daoine mar gheall ar a n-aois nó ar a sláinte. Bíonn tionchar ag a n-ioncam, a stádas fostaíochta nó a leibhéal oideachais freisin ar chumas daoine na guaiseacha sin a sheachaint nó déileáil leo. Déanann tuarascáil an EEA measúnú ar na naisc idir neamhionannais shóisialta agus dhéimeagrafacha agus nochtadh do thruailliú aeir, torann agus teochtaí foircneacha ar scálaí éagsúla san Eoraip.

Breathnaíonn an measúnú a thuairiscítear sa tuarascáil seo ar an bhforluí idir saintréithe sochdhéimeagrafacha agus na leibhéil nochta do ghuaiseacha sláinte comhshaoil laistigh de réigiúin fhonáisiúnta. I roinnt mhaith tíortha Eorpacha, tarlaíonn nochtadh díréireach grúpaí socheacnamaíocha níos ísle do thruailliú aeir, do thorann agus do theochtaí arda i gceantair uirbeacha, agus mar sin tugtar aghaidh sa tuarascáil ar chathracha freisin.

Príomhtheachtaireachtaí

Tá dáileadh míchothrom thionchair an truaillithe aeir, an torainn agus na dteochtaí foircneacha ar shláinte mhuintir na hEorpa ina léiriú dlúth ar na difríochtaí sochdhéimeagrafacha laistigh dár sochaí.

Tá difríochtaí suntasacha réigiúnacha ann maidir le leochaileacht shóisialta agus nochtadh do ghuaiseacha sláinte comhshaoil ar fud na hEorpa.

Ní thugtar aghaidh ar neamhionannais maidir le nochtadh do ghuaiseacha sláinte comhshaoil agus a dtionchar ar shochaí na hEorpa ach beagán leis an mbeartas agus leis an gcleachtas reatha.

Is dócha go leanfar de na neamhionannais shóisialta maidir le tionchair guaiseacha sláinte comhshaoil agus nochtadh dóibh amach anseo agus, dá bhrí sin, tá gá le haitheantas méadaithe i mbeartas ar fud na leibhéal rialachais.