Compás Tacsanomaíochta an Aontais

Is córas aicmithe í Tacsanomaíocht an Aontais, lena mbunaítear liosta gníomhaíochtaí eacnamaíocha atá inbhuanaithe ó thaobh an chomhshaoil de, lena n-áirítear oiriúnú don athrú aeráide. D’fhéadfadh ról tábhachtach a bheith aige maidir le cuidiú leis an Aontas infheistíocht inbhuanaithe a mhéadú agus an Comhaontú Glas don Eoraip a chur chun feidhme. Le Tacsanomaíocht an Aontais, soláthrófar sainmhínithe iomchuí do chuideachtaí, d’infheisteoirí agus do lucht ceaptha beartas ar féidir a mheas ina leith go bhfuil gníomhaíochtaí eacnamaíocha inbhuanaithe ó thaobh an chomhshaoil de. Ar an gcaoi sin, ba cheart dó slándáil a chruthú d’infheisteoirí, infheisteoirí príobháideacha a chosaint ar an nglas-snasú, cabhrú le cuideachtaí a bheith níos neamhdhíobhálaí don aeráid, ilroinnt an mhargaidh a mhaolú agus cuidiú le hinfheistíochtaí a aistriú chuig na háiteanna is mó a bhfuil gá leo

Le Compás Tacsanomaíochta an Aontais, soláthraítear léiriú físiúil ar ábhar Thacsanomaíocht an Aontais, ag tosú leis an nGníomh Tarmligthe maidir leis na cuspóirí aeráide, mar a glacadh é an 4 Meitheamh 2021. Is é is aidhm dó ábhar Thacsanomaíocht an Aontais a dhéanamh níos éasca d’úsáideoirí éagsúla rochtain a fháil air agus cuireann sé ar a gcumas d’úsáideoirí a sheiceáil cé na gníomhaíochtaí a áirítear i dTacsanomaíocht an Aontais (gníomhaíochtaí atá incháilithe don tacsanomaíocht), cé na cuspóirí lena rannchuidíonn siad go mór agus cé na critéir nach mór dóibh a chomhlíonadh. Tá sé tábhachtach a thabhairt faoi deara nach mór coimircí íosta (caighdeáin shóisialta) a chomhlíonadh chun go measfar go bhfuil gníomhaíocht eacnamaíoch ailínithe le tacsanomaíocht.