Is bagairt mhéadaitheach ar an tsláinte agus ar an bhfolláine é an teas foircneach, rud a éilíonn ullmhacht níos láidre, gníomhaíocht chomhordaithe agus cosaint na bpobal is mó atá i mbaol. Leis an imeacht COP31 seo a d’eagraigh EDS/an Eoraip, tabharfar le chéile lucht ceaptha beartas, saineolaithe agus gníomhaithe áitiúla ó gach cearn den Réigiún Eorpach chun ceachtanna ó thonnta teasa a bhí ann le déanaí a chomhroinnt agus chun féachaint ar réitigh phraiticiúla lena n-aistrítear beartais sláinte teasa ina ngníomhaíocht, ó straitéisí náisiúnta go tionscnaimh ar leibhéal an phobail. I measc na gcainteoirí beidh toscairí ó na heagraíochtaí seo a leanas: an Coimisiún Eorpach; Aireacht Chónaidhme na Gearmáine um an gComhshaol, um Ghníomhú ar son na hAeráide, um Chaomhnú an Dúlra agus um Shábháilteacht Núicléach; Aontaithe don Mheabhairshláinte Dhomhanda; Cónaidhm Idirnáisiúnta Chumainn na Croise Deirge agus an Chorráin Dheirg; cathracha na hAithne agus Pháras; Institiúid Ríoga Ailtirí na Breataine; an Eagraíocht Dhomhanda Meitéareolaíochta; agus an Coimisiún Uile-Eorpach um an Aeráid agus an tSláinte. D’fhoilsigh EDS/an Eoraip an dara heagrán dá threoir maidir le Pleananna Gníomhaíochta Teas-Sláinte (HHAPanna), lena gcuirtear creat nuashonraithe ar fáil chun tacú le tíortha agus le pobail ullmhacht, freagairtí comhordaithe agus cosaint i gcoinne na rioscaí sláinte atá ag dul i méid a bhaineann le teas foircneach a neartú.