Il-Programm Qafas tal-UE għar-Riċerka u l-Innovazzjoni – Orizzont 2020

Il-Programm Qafas tal-UE għar-Riċerka u l-Innovazzjoni – Orizzont 2020

Orizzont 2020 huwa l-istrument finanzjarju li jimplimenta l-Unjoni tal-Innovazzjoni, inizjattiva ewlenija tal-Ewropa 2020 li għandha l-għan li tiżgura l-kompetittività globali tal-Ewropa. Mill-2014 sal-2020 b'baġit ta' ftit aktar minn EUR 70 biljun, il-programm il-ġdid tal-UE għar-riċerka u l-innovazzjoni huwa parti mill-isforz biex jinħolqu tkabbir u impjiegi ġodda fl-Ewropa.

Orizzont 2020 jipprovdi simplifikazzjoni kbira permezz ta' sett uniku ta' regoli. Se tikkombina l-finanzjament kollu għar-riċerka u l-innovazzjoni attwalment ipprovdut permezz tal-Programmi Qafas għar-Riċerka u l-Iżvilupp Tekniku, l-attivitajiet relatati mal-innovazzjoni tal-Programm Qafas għall-Kompetittività u l-Innovazzjoni (CIP)u l-Istitut Ewropew tal-Innovazzjoni u t-Teknoloġija (EIT).

Orizzont 2020 se jindirizza l-isfidi tas-soċjetà billi jgħin biex jitnaqqas id-distakk bejn ir-riċerka u s-suq billi, pereżempju, jgħin lill-intrapriżi innovattivi jiżviluppaw l-iskoperti teknoloġiċi tagħhom fi prodotti vijabbli b'potenzjal kummerċjali reali. Dan l-approċċ immexxi mis-suq se jinkludi l-ħolqien ta’ sħubijiet mas-settur privat u mal-Istati Membri biex jinġabru flimkien ir-riżorsi meħtieġa.

Il-kooperazzjoni internazzjonali ser tkun prijorità trasversali importanti ta' Orizzont 2020. Minbarra li Orizzont 2020 huwa kompletament miftuħ għall-parteċipazzjoni internazzjonali, azzjonijiet immirati ma’ pajjiżi u reġjuni sħab ewlenin se jiffukaw fuq il-prijoritajiet strateġiċi tal-UE. Permezz ta’ strateġija ġdida, se jiġi żgurat approċċ strateġiku u koerenti għall-kooperazzjoni internazzjonali fl-Orizzont 2020.