Mekkaniżmu tal-Unjoni għall-Protezzjoni Ċivili

Mekkaniżmu tal-Unjoni għall-Protezzjoni Ċivili

Fl-20 ta' Diċembru 2011 il-Kummissjoni pproponiet Mekkaniżmu tal-Unjoni għall-Protezzjoni Ċivilibiex jissostitwixxi d-Deċiżjonijiet tal-Kunsill dwar il-Mekkaniżmu għall-Protezzjoni Ċivili, li jiffaċilita l-kooperazzjoni msaħħa bejn l-Istati Membri u l-Unjoni fil-qasam tal-protezzjoni ċivili u l-Istrument Finanzjarju għall-Protezzjoni Ċivili, li jipprovdi finanzjament għall-azzjonijiet taħt il-Mekkaniżmu biex tiġi żgurata protezzjoni kontra diżastri naturali u dawk ikkawżati mill-bniedem.

L-azzjonijiet ġenerali li ġejjin għandhom ikunu eliġibbli għall-assistenza finanzjarja:

• studji, stħarriġ, immudellar u bini ta' xenarji biex tiġi ffaċilitata l-kondiviżjoni tal-għarfien, l-aħjar prattiki u l-informazzjoni, u biex jissaħħu l-prevenzjoni, it-tħejjija u r-rispons effettiv;
• taħriġ, eżerċizzji, sessjonijiet ta’ ħidma, skambju ta’ persunal u esperti, il-ħolqien ta’ networks, proġetti ta’ dimostrazzjoni u trasferiment tat-teknoloġija biex jittejbu l-prevenzjoni, it-tħejjija u r-rispons effettiv;
• azzjonijiet ta’ monitoraġġ, valutazzjoni u evalwazzjoni;
• informazzjoni pubblika, edukazzjoni u sensibilizzazzjoni pubblika u azzjonijiet ta' disseminazzjoni assoċjati, sabiex jiġu minimizzati l-effetti tad-diżastri fuq iċ-ċittadini tal-Unjoni u biex iċ-ċittadini tal-Unjoni jiġu megħjuna jipproteġu lilhom infushom b'mod aktar effettiv;
• l-istabbiliment ta' programm ta' tagħlimiet meħuda minn interventi u eżerċizzji fil-kuntest tal-Mekkaniżmu, inkluż dwar oqsma rilevanti għall-prevenzjoni u t-tħejjija;
• azzjonijiet ta' komunikazzjoni u miżuri għall-promozzjoni tal-viżibbiltà tal-ħidma Ewropea tal-protezzjoni ċivili fl-oqsma tal-prevenzjoni, it-tħejjija u r-rispons.

Aktar azzjonijiet eliġibbli għall-assistenza finanzjarja huma definiti għall-prevenzjoni u t-tħejjija, ir-rispons, u l-azzjonijiet marbuta mat-tagħmir, ir-riżorsi tat-trasport u l-loġistika relatata.