L-Atlas Ewropew tal-Ibħra

L-Atlas tal-Ibħra huwa applikazzjoni ġeografika interattiva bbażata fuq il-web, li tipprovdi data ġenerali dwar il-baħar u informazzjoni marittima flimkien ma’ statistika dwar l-ibħra u l-kosti Ewropej. Il-katalgu tal-mapep tal-Atlas ikopri diversi aspetti u karatteristiċi naturali u soċjoekonomiċi fir-reġjuni tal-baħar u kostali tal-Ewropa. L-Atlas huwa tieqa pubblika għall-aċċess ta' informazzjoni u data bbażata fuq mapep li joriġinaw primarjament mill-KE u l-aġenziji tagħha u min-Netwerk Ewropew ta' Osservazzjoni u Data Marittima (EMODnet). L-għan tagħha huwa li ġġib data statistika b’mod viżiv komprensiv lil pubbliku wiesa’ u fl-istess ħin isservi bħala appoġġ għall-politika tal-baħar u l-ekonomija blu.

L-Atlas joffri firxa varjata ta’ informazzjoni dwar suġġetti bħal:

• Il-ġeografija u l-istatistika tar-reġjuni kostali
• Enerġija rinnovabbli u riżorsi marittimi
• Il-fond tal-baħar, l-amplitudni tal-marea u l-erożjoni kostali
• Stokkijiet tas-sajd, kwoti u qabdiet
• Il-flotta tas-sajd Ewropea
• L-Akkwakultura
• Il-portijiet, it-trasport marittimu u t-traffiku
• Żoni tal-baħar protetti
• It-turiżmu kostali
• Politiki u inizjattivi marittimi

L-Atlas jinkludi wkoll il-bażi tad-data ICZM OURCOAST: ġabra komprensiva ta’ mijiet ta’ sommarji ta’ studji ta’ każijiet li jirriflettu eżempji ta’ suċċess ta’ għodod tal-ICZM applikati madwar l-Ewropa.