L-Ewrobarometru annwali dwar it-Tibdil fil-Klima stħarreġ 26,319 ċittadin tal-UE minn gruppi soċjali u demografiċi differenti fis-27 Stat Membru kollha tal-UE fl-2025. Maġġoranza kbira tal-Ewropej għadhom iqisu t-tibdil fil-klima bħala theddida globali serja, b’85 % taċ-ċittadini jidentifikawh bħala problema kbira. Hekk kif it-tħejjijiet javvanzaw biex tiġi emendata l-Liġi Ewropea dwar il-Klima biex tiġi inkluża mira ambizzjuża għall-2040, u jiġi ppreżentat Pjan ġdid tal-UE dwar l-Adattament għall-Klima s-sena d-dieħla, l-UE tibqa’ fit-triq it-tajba lejn in-newtralità klimatika, ibbażata fuq l-innovazzjoni, il-prosperità kondiviża u r-reżiljenza.