It-tisħiħ ta’ Saħħa Waħda

L-approċċ “Saħħa Waħda”, approċċ interkonness għas-saħħa li jirrikonoxxi l-interdipendenza tan-nies, tal-annimali, tal-pjanti u tal-ekosistemi, qed jaqbad it-triq it-tajba fl-Ewropa. Illum, it-13 ta’ Novembru, il-Kummissjoni Ewropea qed torganizza konferenza biex tiddiskuti l-futur tal-politika “Saħħa Waħda” fl-Ewropa. Diversi Aġenziji tal-UE esprimew ukoll l-impenn konġunt tagħhom li jappoġġaw bis-sħiħ l-aġenda "Saħħa Waħda" biex jipprevjenu, jidentifikaw, iħejju u jirrispondu aħjar għat-theddid globali għas-saħħa fil-livelli globali u tal-UE, inklużi dawk relatati mat-tibdil fil-klima.

L-Ewropa qed tiffaċċja theddid dejjem aktar kumpless u frekwenti għas-saħħa u l-benesseri. Ħafna minn dan it-theddid huwa marbut ma’ xejriet mhux sostenibbli ta’ produzzjoni u konsum, u jservi bħala tfakkira qawwija li s-saħħa tal-bniedem hija strettament interkonnessa mas-saħħa tal-annimali, tal-pjanti u tal-ekosistemi. L-ebda dixxiplina individwali jew settur li jaġixxi b’mod iżolat ma jista’ jirrispondi għal dan it-theddid. Il-ħtieġa urġenti għal kollaborazzjoni multisettorjali u transdixxiplinarja fl-oqsma kollha tas-saħħa tal-bniedem, tal-annimali, tal-pjanti u tal-ekosistema hija koperta mill-approċċ Saħħa Waħda.

Il-konferenza “Saħħa Waħda għal Kulħadd, Kollha għal Saħħa Waħda” qed tixxandar fuq l-internet u tista’ tiġi segwita fit-13 ta’ Novembru hawnhekk.

Id-dikjarazzjoni konġunta taċ-Ċentru Ewropew għall-Prevenzjoni u l-Kontroll tal-Mard (ECDC), l-Aġenzija Ewropea għas-Sustanzi Kimiċi (ECHA), l-Aġenzija Ewropea għall-Ambjent (EEA), l-Awtorità Ewropea dwar is-Sigurtà fl-Ikel (EFSA) u l-Aġenzija Ewropea għall-Mediċini (EMA) tista’ tiġi kkonsultata hawnhekk.