5.4 L-indirizzar tat-tibdil fil-klima permezz tal-adattament u l-mitigazzjoni

Il-mitigazzjoni tal-impatti tat-tibdil fil-klima, permezz tat-tnaqqis tal-emissjonijiet tal-gassijiet serra, u l-adattament għar-riskji maħluqa mit-tibdil fil-klima huma żewġ approċċi komplementari biex jiġi indirizzat it-tibdil fil-klima. Peress li kemm il-mitigazzjoni kif ukoll l-adattament jindirizzaw l-istess kawża tal-impatt, jeħtieġ li jaħdmu b’mod integrat biex jiksbu b’suċċess l-għanijiet rispettivi tagħhom. Barra minn hekk, diversi miżuri ta’ adattament jistgħu jikkontribwixxu għall-kisba tal-għanijiet ta’ mitigazzjoni u viċi versa, u b’hekk jimmassimizzaw il-kobenefiċċji potenzjali.

Deċiżjoni għall-mitigazzjoni jew l-adattament normalment tittieħed f’livelli differenti ta’ governanza u minn gruppi differenti ta’ dawk li jieħdu d-deċiżjonijiet. Id-differenza ewlenija bejn dawn iż-żewġ oqsma ta’ politika hija li l-isforzi ta’ mitigazzjoni jikkontribwixxu għat-tnaqqis tal-emissjonijiet ta’ gassijiet serra filwaqt li l-isforzi ta’ adattament jikkontribwixxu biex tiżdied ir-reżiljenza għall-impatti tat-tibdil fil-klima.  Sabiex it-tnejn jiġu allinjati, huwa rrakkomandat ħafna li l-partijiet ikkonċernati li jirrappreżentaw l-ippjanar u l-implimentazzjoni tal-mitigazzjoni jkunu involuti fiċ-ċiklu tal-ippjanar u tal-implimentazzjoni tal-adattament għal feedback u kontroverifika kontinwi (ara wkoll il-Pass 1.3 u l-Pass 1.6).

Il-kunsiderazzjonijiet li ġejjin jistgħu jkunu ta’ għajnuna biex tiġi ddeterminata l-interazzjoni bejn il-mitigazzjoni u l-adattament:

• L-azzjonijiet ta’ adattament għandhom impatt fuq l-objettivi ta’ mitigazzjoni? Pereżempju, xi miżuri ta’ adattament jistgħu jeħtieġu żieda fl-użu tal-enerġija; l-għażla li tintuża l-enerġija minn sorsi rinnovabbli se tippermetti inqas kompromessi negattivi mal-mitigazzjoni.

• L-azzjonijiet ta’ mitigazzjoni għandhom impatt fuq l-objettivi ta’ adattament? Pereżempju, l-afforestazzjoni mmirata biex iżżid is-sekwestru tal-karbonju bħala miżura ta’ mitigazzjoni f’reġjun arid tista’ tikkawża domanda ogħla għal riżorsi tal-ilma limitati u li qed jonqsu, u b’hekk tillimita l-potenzjal ta’ adattament. Il-kompetizzjoni għar-riżorsi tal-art tista’ tinħoloq ukoll bejn il-miżuri ta’ mitigazzjoni u ta’ adattament. Għalhekk, l-ippjanar integrat huwa rrakkomandat ħafna għall-identifikazzjoni tal-aktar taħlita ta’ benefiċċju ta’ miżuri ta’ mitigazzjoni u adattament.

• Hemm proċessi oħra li għandhom impatt kemm fuq l-azzjonijiet ta’ mitigazzjoni kif ukoll fuq dawk ta’ adattament? Dawn jistgħu jkunu proċessi f’diversi oqsma ta’ politika u ta’ teħid ta’ deċiżjonijiet li għandhom il-potenzjal li jkollhom impatt indirett kemm fuq il-mitigazzjoni kif ukoll fuq l-adattament, eż. l-ippjanar tal-użu tal-art u tal-ispazju urban, l-ippjanar tar-riżorsi tal-ilma, il-ġestjoni tar-riskju ta’ diżastri, l-ippjanar tal-iżvilupp strateġiku, il-kunsiderazzjonijiet baġitarji, il-proġetti ta’ infrastruttura, il-politiki tas-saħħa u soċjali, eċċ. L-integrazzjoni (ara l-Pass 5.3)tal-kunsiderazzjonijiet tal-mitigazzjoni u tal-adattament fl-oqsma rilevanti kollha tat-teħid tad-deċiżjonijiet hija essenzjali biex tiġi żgurata l-koerenza bejn id-diversi għanijiet strateġiċi.

• Hemm deċiżjonijiet li jtejbu l-kobenefiċċji jew jikkawżaw kompromessi bejn l-adattament u l-mitigazzjoni? Dawn jistgħu jkunu deċiżjonijiet li huma direttament rilevanti kemm għall-adattament kif ukoll għall-mitigazzjoni, madankollu, ma jqisux b’mod espliċitu l-kobenefiċċji u l-kompromessi, eż. dwar l-allokazzjoni tal-ilma bejn l-enerġija idroelettrika u l-użu konsumiv, l-allokazzjonijiet baġitarji għall-attivitajiet ta’ mitigazzjoni u adattament, is-sistemi ta’ monitoraġġ li jkopru kemm l-adattament kif ukoll il-mitigazzjoni, id-deċiżjonijiet dwar il-kopertura tal-media li jiffavorixxu jew il-mitigazzjoni jew l-adattament b’mod żbilanċjat. Fil-każijiet kollha fejn id-deċiżjonijiet jittieħdu b’impatti diretti kemm fuq l-adattament kif ukoll fuq il-mitigazzjoni, huwa rrakkomandat ħafna li jiġu stabbiliti mekkaniżmi biex jindirizzaw b’mod espliċitu l-interazzjonijiet.

Is-setturi urbani ewlenin bl-aktar sinerġiji bejn l-adattament u l-mitigazzjoni huma l-ippjanar spazjali, l-enerġija u l-kostruzzjoni/il-bini (ara l-Pass 2.3)

Sabiex jiġu indirizzati b’mod xieraq dawn l-aspetti ta’ interkonnessjoni, jeħtieġ li jiġu inklużi kunsiderazzjonijiet ta’ mitigazzjoni matul iċ-ċiklu ta’ adattament, bl-aktar mod prominenti meta jiġu identifikati, ivvalutati u magħżula l-għażliet ta’ adattament (ara l-Pass 3 u l-Pass 4). Barra minn hekk, l-istrateġija ta’ adattament u l-pjan ta’ azzjoni żviluppati (ara l-Pass 5.1) għandhom jindirizzaw l-interazzjonijiet u s-sinerġiji mal-isforzi ta’ mitigazzjoni.